Kalapo Nyiua Gading
Kapa Ulando Bapetak-petak
Banyak taserak buah palo
Nangkodoh Datuak Rajo Indomo
Balabuah sanjo pukua anam
Kaba lah lamo ko mah talatak
Kini dicetak diulang pulo
Mauling kaji nan lah lamo
Mambangkik tarikh nan tabanam
Elok dikumpa ujuang tali
Buliah pangabek aka baha
Aka diambiak ka taruko
Elok dikumpa ujuang nyanyi
Nyanyi tacoreang jadi kaba
Kaba curito Cindua Mato.
Olak olainyo maso itu, iyo diranah Tanjuang Bungom dalam ustano Paga Ruyuang, Ustano Daulat Bundo Kanduang, Ustano Gadang Malighai Tinggi, baanjuang perak anjang suaso, tampek sumayam bundo kanduang,Rajo usali turun tamurun, bukan rajo dang mamintak,bukan rajo dang babali,samo tajadi jo alam nangko.
Rajo badiri sandirinyo, timbalan Rajo Bana Ruhum, timbalan Rajo Banua Cino,timbalan Rajo dilautan,sapiah balahan jurai,manjunjuang mangkuto kulah kamar,batatah Intan Mutiaro,bajambua baameh mutu,mamakai kain si gandun-gandun,dikambang saleba alam,dibalun sabalun kuku,satahun Bundo mananun,dimuloi jo lidah aia,disudahi jo lidah api,kain bapantang lusuah,makin dipakai makin baru,mamakai karih kasatian,karih banamo medang giri,bahulu kamuniang jantan,bapaluik ameh suaso,baukia bamego-mego,sarangnyo kayu kamaik,kayu batuah kayu kiramaik,karih pandai mancari musuah,jajak ditikan mati juo,karih pusako niniak muyang,manaruah tataran saga jantan,tombak parisai jangguik-janggi.
Kakalau diliek balairuangnyo,tampek rapek basa-basa,batonggak batang jilatang,baparan kayu lundang,banduanyo batang bayam,batabuah puluik-puluik,bagandang saliguri,balapiak lumuik suto.
Birawari Bundo Kanduang,sadang lalok diateh anjuang,patang Kami malam jum’at,bulan panuah ampek baleh,bulan sarupo kadibasuah,kiro-kiro tangah malam,sadang lalok tibo rasian,bamimpi rang tuo panjang jangguik,jangguik putiah sampai ka pusek,basorban babaju putiah,bakato rang tuo nantun :
“manolah cucu rajo usali,mangkuto alamdalam nagari,pusek jalo,pumpunan ikan,urang sati lagi kiramaik,jikok hari nan barisuak,hari jum’at tangah hari,ambiak karambia nyiua gadiang,balah buahnyo bagi duo,makan baduo jo sikambang”
Baitu raso mimpi tibo,sadang lalok barasian,sadang tidua inyo bamimpi,satu tajago hari siang,tadanga murai bakicau,jago sugiro bundo kanduang,tatagun duduak sakutiko,raso tadanga suaronyo,apo alamaik mimpi nantun,tamanuang Daulat Bundo Kanduang,dierak kalua kulambu rumin,rambuik tagerai dikapalo.
Ado sabanta antaronyo,tibo sikambang nan batujuah,sikambang manih mambao minyak,minyak harum puti-puti,sikambang bungo mambao param,bukan sarupo param kini,harum shaari parjalanan,sikambang kuniang mambao kasai,nan lain mabao payuang,payuang panji kabasaran,kipeh basabuang suok kida,bajalan sugiro turun kajanjang,sikambang mairiang dibalakang,bajalan bairiang-iriang.
Sadang bajalan pai mandi,takana mimpi nan samalam,bajalan tadayuah-dayuah. Alah sarantang pajalanan alah cukuik ka duo rantang panjang, tibo dilubuak puti mandi,baranti bundo sakutiko,iyo dilubuak nan sati,aia janiah ikannyo jinak,disanan ikan badarai ameh,diateh baringin sonsang,lubuak bapaga batu gadang,salo manyalo batu ketek,ateh bapanga pudiang ameh,salo manyalo bungo rayo,dihilia buayo putiah daguak,ditangah0tangah sirangkak hitam.
Kan iyo Bundo Kanduang diluluihkan pakaian nan di badan,takanak sakali kain basahan,kain Basahan Cindai Aluih,tampak rupo putiah kuniang. Mandi pulo sikambang Bandahari,sarato sikambang bungo,sikambang manih jo sikambang kuniang,samo tajun dalam aia,bunyi kacimpuang marewan hati,adang-adang tadanga randah,adang-adang tadanga tinggi,runtuah pikiran mandangakan,mandi bakusuak jo baliamau,sarato babadak jo bakasai.
Lah sudah mandi basiram,dikanakkan pakaian hanyo lai,bajalan babaliak pulang,sikambang mairiang dibalakang. Alah sarantang pajalanan,cukuik kaduo rantang panjang,alah tibo dihalaman,ditingkek janjang ditapuak bandua. Satu tibo dalam sutano,nasi taedang manantikan,dibukan cando tulang saji,makanlah inyo Bundo Kanduang,Mangkuto Alam Minangkabau Daulat Rajo Paga Ruyuang.
Lah sudah minum jo makan,dikunyah siriah na sakapua,siriah mambayang ka muko. Ado sabanta antaronyo,takana mimpi tadi malam,urang tuo panjang jangguik,raso tampak diruang mato,saroban putiah bajubah putiah,jangguik panjang sampai ka pusek.
Kan iyo maso itu,hari lah puua duo baleh.sadang tangah hari tapek,diimbau selamat panjang gombak,sarato jo sibarakat.satu tibo inyo manyambah.
“ampun Bundo Kanduang,jikok dibuang kami jauah,jikok dipancuang kami mati,apo parentah kami junjuang.”
Manitah Daulat Bundo Kanduang: “mano kalian nan baduo,ambiaklah buah batang kalapo,batang kalapo Nyiua Gadiang,ambiak buahnyo na mudo,karambia sadang sudu-suduan,usah pulo nan mudo bana.”
Mandanga kato nan bak kian,manyambah Salam jo Barakat :
“Ampun baribu kali ampun,lorong kapado titah bundo,denai jujuang dikapalo,denai pikiua di bahu. Tapi sungguah nan bak kian,karano karambia sangaik sati,dijago dek ula nan taduang,kapalo sipasan dangan lipan,manjago karambia nan kiramaik,”
Mandanga kato nan bak kian,manitah daulat Bundo Kanduang:
“iriang kan malah denai kahalaman,” lalu dikunyah siriah piganta,taruih disambua rumpun karambia,takuik sagalo kalo jo lipan,sarato ula paunyi,diansua lari ka puncaknyo.
Lorong kapado kalapo Nyiua gadiang,Karambia Sati lagi Batuah,puncakno ado malepai awandaunnyo manyapu tanah,bajago kalo dangan lipan,naniang basarang didahannyo,nago basarang di rumpunnyo,takuik jo ganta si salamat. Dek untuang maso itu,tibo dirumpun tandan karambia,diambiak karambia nan sabuah,baru dapek sanang pikiran,dijatuahkan sakali ka tanah,tibo ditanah tanah lambang,tibo di batu batu balah,turun sugiro si salamat,diambiak karambia dek si barakat, balari naiak ka Ustano. Bundo mananti diambang pintu,galak tasanyum bundo kanduang sanang pikiran maso itu.
Hari nan sadang tanah ari,sadang bunta bayang-bayang,sadang linduang saliguri,dibalah kalapo dek sikambang,iyo sikambang Bandhari,ditampuang aia kumalo perak,aia diminum bundo kanduang,aia nyo harum manih taraso.salamak santan jo tangguli,dimakan isinyo tapi santan,maminum pulo si kambang Bandahari,samo mamakan kaduonyo,Sampureh dibuang ka halaman,jadi biso,sampureh tibo didaun jilatang,biso pulo batang jilatan. Baitu kaba kato urang,kito nan hutang mangabaan.
Kan iyo wakatu itu,sudah maminum aia karambia,hamillah Daulat Bundo kanduang,baitu juo si Kambang Bandahari. Sajak manganduang kaduonyo, disuruah cari susu harimau,sarato hati buayo,pangidaman Bundo Kanduang,payah rakyaik mancarikan,kadalam Hutan Rimbo Rayo,tigo bulan lamo mancari,dapek idaman rang manganduang.
Cukuik bilangan sambilan bulan,sambilan bulan sapuluah hari,patang salasa malam raba’a,hari rancak bulan tarang,taraso sakik Bundo Kanduang,sakik pulo sikambang Bandahari,sakik basalin ka baranak.
Tibo dukun nan pandai-pandai,panuah Ustano nan gadang,bahimpun sagalo Bini Basa,bini Basa Ampek balai,bajago-jago samalam nan tun. Badantang patuih tungga,bakukuak ayam kinantan,malanguah kabau si binuang,maringkik kudo sibinuang,babunyi salindik jantan,laia lah anak Bundo Kanduang baitu pulo jo sikambang Bandahari,samo laia samalam nan tun.
Diliek anak laki-laki,laki-laki kaduonyo,tibo dilantai lantai tabuah,tibo ditanah tanah lambang,anak babaju kaduo nyo,anak batuah jo kiramaik,tidak dapek ditantang nyato,bak mamandang matohari,satu ado satu banamo. Surang banamo sutan Rumanduang,anak kanduang rajo kito,Mangkuto Ulak Tanjuang Bungo,tinggi nan tidak bapucuak,mamacik tampuak Minangkabau. Nan surang banamo Cindua Mato,urang kiramaik kaduonyo,urang batuah hiduik-hiduik,kalau ditantang mato buto,kalau disabuik lidah kalu,kalau dikana hati litak,ruponyo rancak kaduonyo, bak pinang dibalah duo,sarupo dasun dibalah ampek,ragulah urang mamandangi.
Kan iyo Bundo Kanduang,urang Arif bijaksano,maliek anak sadang bamain,bamain inyo kaduonyo,sambah manyambah salah surang,itulah nan banamo Cindua mato. Kalau bajalan kaduonyo,mano maiiriang dibalakang,itulah anak si Kambang Bandahari. Mano duduak dikursi itulah si buyuang Sutan Rumanduang,Daulat Dang Tuanku,nan baselo dilantai,nan banamo Cindua mato.
Lorong kapado nan baduo,sarupo urang badunsanak,samo cadiak kaduonyo,sangaik pandai bakato-kato,muluik manik kucindan murah.
Urang padang mamuta banang
Diputa dilipek ampek
Dilipek lalu dipaduo
Indak guno dirantang panjang
Elok dikumpa nan nyo singkek
Singek diambiak sajo nan paguno
